Dhule Ganpati Visarjan Accident: गणपती बाप्पाच्या विसर्जन मिरवणुकीदरम्यान तथा सर्व आनंदात बाप्पाला निरोप देताना धुळे जिल्ह्यात एक धक्कादायक घटना घडली आहे.
हायलाइट्स:
- गणपती बाप्पाच्या विसर्जन मिरवणुकीदरम्यान धक्कादायक घटना
- मद्यधुंद असलेल्या दुसऱ्या चालकाने अचानक ट्रॅक्टर केलं सुरु
- ट्रॅक्टरखाली येऊन तीन बालकांचा मृत्यू, तर सहाजण जखमी
धुळे : गेल्या १० दिवसांपासून अवघ्या महाराष्ट्राचं वातावरण भक्तिमय करून टाकणाऱ्या गणेशोत्सवाचा आज शेवटचा दिवस असून लाडक्या गणरायाला निरोप देण्यासाठी गणेशभक्तांनी जय्यत तयारी केली आहे. मुंबई-पुण्यासह राज्यभरात बाप्पांच्या मिरवणुकीसाठी ठिकठिकाणी आयोजन करण्यात आलं आहे. पोलीस यंत्रणा यादरम्यान कोणताही अनुचित प्रकार घडू नये यासाठी सज्ज आहे. त्याव्यतिरिक्त मिरवणूक जाणाऱ्या मार्गांवरील वाहतूकही तात्पुरती इतर मार्गांवर वळवण्यात आली आहे.
गणपती बाप्पाच्या विसर्जन मिरवणुकीदरम्यान तथा सर्व आनंदात बाप्पाला निरोप देताना धुळे जिल्ह्यात एक हृदयद्रावक घटना घडली आहे. गणपती विसर्जन मिरवणुकीदरम्यान तीन जणांचा मृत्यू झाला असून सहा जण जखमी झाले आहेत. धुळे शहराला लागून असलेल्या चित्तोड गावात मिरवणूक सुरू असताना ही दुर्घटना घडली आहे. एकलव्य मित्र मंडळाच्या वतीने विसर्जन मिरवणूक काढण्यात आली होती. मिरवणूक सुरू असताना एका ठिकाणी थांबून सर्व कार्यकर्ते नाचत होते.
ट्रॅक्टरखाली चिरडून तीन चिमुकल्यांचा अंत
मद्यधुंद असलेल्या दुसऱ्या चालकाने ट्रॅक्टर अचानक सुरू केल्याने ट्रॅक्टरखाली चिरडून तीन लहान बालकांचा मृत्यू तर सहाजण ट्रॅक्टरखाली आल्याने मोठाअपघात झाला आहे. मृतांमध्ये एक मुलगी आणि दोन मुलांचा समावेश आहे. दरम्यान, जखमींना तातडीने हिरे वैद्यकीय महाविद्यालयात उपचारासाठी दाखल करण्यात आलं आहे. या घटनेमुळे एकच खळबळ उडाली असून ट्रॅक्टर चालक हा मद्यधुंदीत असल्याची प्राथमिक माहिती समोर आली आहे. दरम्यान, संपूर्ण प्रकरणाचा तपास धुळे तालुका पोलीस करत आहेत.
मयत
परी शांताराम बागुल : वय १३शेरा बापू सोनवणे : वय ६
लड्डू पावरा : वय ३
जखमी
गायत्री निकम पवार : वय २५विद्या भगवान जाधव : वय २७
अजय रमेश सोमवंशी वय : २३
उज्वला चंदू मालचे : वय २३
ललिता पिंटू मोरे : वय १६
रिया दुर्गेश सोनवणे : वय १७
