धुळे दर्पण न्यूज :- धुळे शहरातील माजी आमदार अनिल अण्णा गोटे यांनी फारुक शहा यांच्या विरोधात गंभीर आरोप करत एक विस्तृत पत्रक जाहीर केले आहे. या पत्रकात गोटे यांनी फारुक शहा यांच्यावर बेकायदेशीर कामकाज, फसवणूक, आणि गरीब जनतेच्या जीवनाशी खेळ करण्याचे आरोप केले आहेत. गोटे यांच्या मते, शहा यांनी केवळ पैसे कमावण्याच्या हव्यासापोटी धुळ्यातील जनतेच्या जीवावर उदार होऊन अनेक बेकायदेशीर प्रकल्प सुरू केले आहेत. त्यांनी हा दावा केला की शहा यांची भूमिका अत्यंत स्वार्थी असून, गरीब लोकांच्या दु:खाशी खेळ करत त्यांनी स्वतःची संपत्ती वाढवण्याचे काम केले आहे.


  गोटे यांच्या पत्रकात सर्वात मोठा मुद्दा हा हाजी अन्वर शहा यांच्या नावाने सुरु करण्यात आलेल्या हॉस्पिटलबाबत आहे. गोटे यांच्या मते, हे हॉस्पिटल कोणत्याही कायदेशीर मान्यता किंवा परवानगीशिवाय सुरु करण्यात आले आहे. महाराष्ट्रात हॉस्पिटल सुरु करण्यासाठी 'बॉम्बे नर्सिंग अॅक्ट'नुसार काही कडक अटी व शर्तींची पूर्तता करावी लागते, जसे की हॉस्पिटलचा डॉक्टर मान्यताप्राप्त विद्यापीठातून पदवीधर असणे आवश्यक आहे. मात्र, गोटे यांच्या म्हणण्यानुसार, फारुक शहा यांनी याचे कोणतेही पालन केले नाही, आणि गरताड विद्यापीठाचे गोल्ड मेडलिस्ट असल्याचा दावा देखील पूर्णपणे खोटा आहे.

"बातम्यासाठी या ग्रुपमध्ये जॉईन व्हा."

  त्यांच्या मते, शहा यांच्याकडे प्रॅक्टिस करण्यासाठी आवश्यक ती कागदपत्रे आणि नोंदणी देखील नाहीत. गोटे यांनी असा आरोप केला की, शहा यांनी लोकांना फसवून त्यांची सेवा करण्याच्या नावाखाली बोगस हॉस्पिटल सुरु केले आहे, ज्यामुळे अनेक गरिबांना फसवण्यात आले आहे. गोटे यांनी असा इशारा दिला की, जर उद्या या हॉस्पिटलमध्ये कोणतीही अनुचित घटना घडली, तर त्याला जबाबदार ठरवण्यासाठी जिल्हा शल्य चिकित्सक, सिव्हील सर्जन, हिरे वैद्यकीय महाविद्यालयाचे डीन, जिल्हाधिकारी, पोलीस अधीक्षक, आणि महानगरपालिकेचे आयुक्त यांना जबाबदार धरले जाईल.


  फारुक शहा यांच्यावर गोटे यांनी आणखी एक गंभीर आरोप केला की, त्यांनी वक्फ बोर्डाच्या जागेवर हक्क सांगण्याच्या नावाखाली जमिनी बळकावण्याचा प्रयत्न केला आहे. गोटे यांच्या म्हणण्यानुसार, फारुक शहा यांचे धुळ्याशी कोणतेही मूळ संबंध नाहीत आणि त्यांचे खोटे दावे लोकांची दिशाभूल करण्यासाठी आहेत. शहा यांच्या कुटुंबाचा मूळ व्यवसाय फकीरी होता आणि त्यांचे पूर्वज धुळ्यात उपाशीपोटी आले होते. गोटे यांनी फारुक शहा यांच्या वडिलांवरही टीका करत सांगितले की, त्यांनी गरीबांचे धान्य आणि पैसे मागून जीवन जगले आहे.


  अनिल गोटे यांनी फारुक शहा यांच्या राजकीय प्रवृत्तीवर देखील प्रहार केला. त्यांनी असा आरोप केला की, शहा यांनी मुस्लिम धर्माच्या मतांवर ताबा मिळवून आमदार बनण्याचा प्रयत्न केला, परंतु मतदानाचे समर्थन मात्र भारतीय जनता पक्षाला दिले आहे. या विरोधाभासामुळे शहा यांचे राजकारण टिकणार नाही, असा इशारा गोटे यांनी दिला आहे.


  शेवटी, गोटे यांनी असा इशारा दिला की फारुक शहा यांच्या सर्व बेकायदेशीर कामकाजाची चीरफाड यथावकाश होईल. गरीबांच्या जीवनाशी खेळ करून संपत्ती कमवणे हा शहा यांचा मुख्य हेतू आहे, असे गोटे म्हणाले. त्यांच्या मते, अशा लोकांना ना धर्माची भीती असते, ना कायद्याची, आणि ना परमेश्वराची. गोटे यांच्या पत्रकानुसार, फारुक शहा यांनी जणू 'प्रेताच्या टाळूवरील लोणी' खाण्याचा उद्योग केला आहे, आणि त्यांचे सर्व काळे कारनामे लवकरच उघडकीस येणार आहेत.