धुळे दर्पण न्यूज :- प्रजासत्ताक दिनानिमित्त राष्ट्रध्वजाचा वापर करताना नागरिकांनी योग्य ती काळजी घेऊन त्याचा मान राखावा, असे आवाहन पोलिस अधीक्षक श्रीकांत धिवरे यांनी केले आहे. एका प्रसिद्धीपत्रकाद्वारे त्यांनी नागरिकांना राष्ट्रध्वजाच्या सन्मानाची आठवण करून देत शासनाच्या नियमानुसार वर्तण्याचे आवाहन केले.

Follow the धुळे दर्पण channel on WhatsApp:

   प्रजासत्ताक दिन हा भारताच्या राष्ट्रीय उत्सवांपैकी एक महत्त्वाचा दिवस असून, या दिवशी देशभरात शासकीय, निमशासकीय तसेच खासगी पातळीवर विविध कार्यक्रमांद्वारे ध्वजारोहण केले जाते. राष्ट्रध्वजाविषयी असलेले प्रेम, अभिमान व निष्ठा दर्शविण्यासाठी नागरिक वैयक्तिकरीत्या लहान आकाराचे कागदी किंवा प्लास्टिकचे ध्वज खरेदी करतात. मात्र, सण संपल्यानंतर अनेकदा या ध्वजांचा योग्य तो सन्मान राखला जात नाही.


राष्ट्रध्वजाच्या अवमानास कायदेशीर कारवाईचा इशारा

   श्री. धिवरे यांनी सांगितले की, राष्ट्रध्वजाचा जाणीवपूर्वक अवमान केल्यास राष्ट्रीय अपमान प्रतिबंध कायदा १९७१ अंतर्गत कलम २ नुसार कडक कायदेशीर कारवाई केली जाऊ शकते. अनेकदा राष्ट्रीय कार्यक्रमांनंतर वापरलेले लहान ध्वज रस्त्यांवर विखुरलेले दिसतात, जे राष्ट्रीय सन्मानाला तडा देणारे ठरते. अशा घटनांना आळा घालण्यासाठी प्रशासनाने विशेष काळजी घेण्याची गरज असल्याचेही त्यांनी नमूद केले.

"बातम्यासाठी या ग्रुपमध्ये जॉईन व्हा."

सामाजिक संस्थांसाठी जबाबदारी

   सामाजिक संस्था व संघटनांनी राष्ट्रीय सन्मान जपण्यासाठी सक्रिय भूमिका बजावावी, असे आवाहनही त्यांनी केले. वापरानंतर राष्ट्रध्वज कुठेही पडलेले आढळल्यास त्यांना एकत्र गोळा करून सन्मानाने प्रशासनाकडे सुपूर्द करण्याचे निर्देश दिले आहेत. जिल्हाधिकारी व तहसीलदार कार्यालयाच्या सहकार्याने असे ध्वज सन्मानपूर्वक नष्ट केले जावेत.


प्लास्टिक ध्वजांच्या वापरावर बंदी

   शासनाच्या निर्देशानुसार प्लास्टिकचे ध्वज वापरण्यावर बंदी आहे. त्यामुळे नागरिकांनी कागदी ध्वजांचा वापर करावा. तथापि, कागदी ध्वजांचा वापर करतानाही त्यांचा मान राखणे अत्यावश्यक आहे. रस्त्यावर अथवा सार्वजनिक ठिकाणी विखुरलेले ध्वज दिसणे, हे राष्ट्रीय प्रतिष्ठेच्या दृष्टीने अत्यंत गंभीर असल्याचे श्रीकांत धिवरे यांनी स्पष्ट केले.

- Advertisement -

राष्ट्रीय सन्मानासाठी नागरिकांचे योगदान आवश्यक

   श्री. धिवरे यांनी सांगितले की, प्रत्येक नागरिकाने राष्ट्रध्वजाचा योग्य सन्मान राखून आपले कर्तव्य पार पाडावे. प्रजासत्ताक दिनानिमित्त राष्ट्रध्वजाशी संबंधित नियमांचे काटेकोर पालन करून देशप्रेमाचा सन्मान ठेवावा, असे आवाहन त्यांनी शेवटी केले.

– धुळे दर्पण – 

(आपल्या शहराच्या प्रत्येक घडामोडींचा वार्ताहर)

(आपल्या धुळे शहराची नवी दिशा)

तुमच्या सेवा आणि सुविधांची माहिती देणारे तुमचे विश्वासू माध्यम