फागणे येथील महिलेच्या नावाचा अपप्रचार?

  धुळे दर्पण न्यूज :- मोहाडी प्र. डांगरी (ता. धुळे) येथील स्मशानभूमीत २५ जानेवारी रोजी घडलेल्या एका संशयास्पद घटनेमुळे संपूर्ण परिसरात खळबळ उडाली आहे. अघोरी विधी आणि काळ्या जादूटोण्याच्या संशयास्पद घटनेत अनेक व्यक्तींचे फोटो सापडले. विशेष म्हणजे यात फागणे (ता. धुळे) येथील सौ. पूजा मनोहर बडगुजर यांचाही फोटो आढळल्यामुळे त्यांच्याविरोधात समाजात गैरसमज पसरू लागला.

Follow the धुळे दर्पण channel on WhatsApp:

पूजा बडगुजर यांचे स्पष्टीकरण

  सदर प्रकाराबाबत सौ. पूजा बडगुजर यांनी स्पष्ट भूमिका घेतली आहे. त्यांच्या नावाचा हेतूपुरस्सर गैरवापर होत असून, त्यांच्यावर जाणूनबुजून आरोप करण्यात आल्याचा दावा त्यांनी केला आहे. त्यांनी धुळे पोलीस अधीक्षक कार्यालय, अंधश्रद्धा निर्मूलन समिती आणि संबंधित यंत्रणांकडे याबाबत निवेदन दिले आहे.

"बातम्यासाठी या ग्रुपमध्ये जॉईन व्हा."

  "मी मागील १५-१८ महिन्यांपासून सासरच्या लोकांपासून विभक्त राहते. ज्या १०-१२ जणांचे फोटो स्मशानभूमीत आढळले, त्यांना जमा करणे किंवा मिळवणे माझ्यासाठी शक्य नाही. मात्र, माझा फोटो तिथे सापडला आहे, याचा अर्थ कोणी तरी जाणूनबुजून माझ्यावर काळ्या जादूचा आरोप करण्याचा प्रयत्न करत आहे," असे त्यांनी सांगितले.

- Advertisement -

कौटुंबिक वादाची पार्श्वभूमी?

  पूजा बडगुजर यांनी सांगितले की, त्यांचा आणि त्यांचे पती मनोहर बडगुजर यांचा गेल्या वर्षभरापासून दुरावा आहे. घटस्फोटाच्या प्रकरणात सासरच्या लोकांकडून सहकार्य मिळाले नाही. पतीकडूनही आधार मिळत नसल्याने त्या स्वबळावर आपल्या मुलाचा सांभाळ करत आहेत.

  "माझ्यावर खोटे आरोप करण्यात आले असून, माझे नाव या घटनेत गोवण्याचा प्रयत्न केला जात आहे. पोलीस प्रशासनाने या प्रकरणाची सखोल चौकशी करून सत्य बाहेर आणावे आणि दोषींवर कारवाई करावी," अशी मागणी त्यांनी केली आहे.


अंधश्रद्धेच्या विळख्यात समाज?

  या घटनेमुळे परिसरात संभ्रम निर्माण झाला आहे. समाजातील काही व्यक्ती अजूनही अघोरी पूजेसारख्या अनिष्ट प्रथांवर विश्वास ठेवत आहेत. अंधश्रद्धा निर्मूलन समितीने देखील याची गंभीर दखल घेतली असून, काळ्या जादूविरोधी कायद्यानुसार दोषींवर कारवाई करण्याची मागणी केली जात आहे.


पोलीस तपास कोणत्या टप्प्यावर?

  सध्या पोलीस याप्रकरणी अधिक तपास करत आहेत. स्मशानभूमीत आढळलेल्या पुराव्यांची पडताळणी सुरू आहे. पूजा बडगुजर यांनी केलेले आरोप आणि त्यांच्या सासरच्या लोकांनी याबाबत दिलेली माहिती याचा पोलीस कसून तपास करत आहेत.


  धुळे जिल्ह्यातील ही घटना अंधश्रद्धेच्या विळख्यात अडकलेल्या समाजव्यवस्थेचे प्रतिबिंब आहे. या प्रकारावर वेळीच अंकुश न लावल्यास अशा घटनांमुळे निष्पाप लोकांना विनाकारण त्रास सहन करावा लागू शकतो. त्यामुळे समाजाने पुराव्याशिवाय कुठल्याही निष्कर्षांवर पोहोचू नये, असे आवाहन करण्यात येत आहे.

– धुळे दर्पण – 

(आपल्या शहराच्या प्रत्येक घडामोडींचा वार्ताहर)

(आपल्या धुळे शहराची नवी दिशा)

तुमच्या सेवा आणि सुविधांची माहिती देणारे तुमचे विश्वासू माध्यम

- Advertisement -