धुळे दर्पण न्यूज :- शहरातील महापालिकेच्या करवसुलीचे प्रमाण समाधानकारक नसल्याने आर्थिक नियोजन कोलमडले आहे. यंदा मार्चअखेरपर्यंत महापालिकेला केवळ ५० टक्के कर वसूल करता आला आहे. त्यामुळे आगामी आर्थिक वर्षात जवळपास १४ कोटी रुपयांच्या विकासकामांना ब्रेक लागणार आहे. उत्पन्न अपुरे असल्याने महापालिकेने अर्थसंकल्पात ही कामेच समाविष्ट केली नसल्याचे स्पष्ट झाले आहे.
Follow the धुळे दर्पण channel on WhatsApp:
६० कोटींपैकी केवळ २८ कोटींचीच वसुली
महापालिकेच्या महसुली उत्पन्नाचा मोठा भाग मालमत्ता कर, पाणीपट्टी, विविध प्रकारचे शुल्क आणि शास्तीमधून येतो. चालू आर्थिक वर्षात महापालिकेने ६० कोटी रुपयांची करवसुली अपेक्षित धरली होती. मात्र, मार्चअखेरपर्यंत फक्त २८ कोटी रुपये वसूल झाले. उर्वरित पाच दिवसांत आणखी ८ कोटी रुपये वसूल करण्याचे उद्दिष्ट आहे, जे अत्यंत कठीण असल्याचे जाणकार सांगतात. याचा परिणाम विकासकामांवर होणार असून, महापालिका फंडातून होणारी ५० ते ६० कामे यंदा मंजूरच करण्यात आलेली नाहीत.
 |
| - Advertisement - |
महापालिकेच्या आर्थिक स्थितीचा परिणाम केवळ विकासकामांवरच नव्हे, तर नियमित सेवांवरही होऊ लागला आहे. कचरा संकलनासाठी नव्या कंत्राटाची प्रक्रिया रद्द करून, ती जबाबदारी महापालिका स्वतः सांभाळणार आहे. यामुळे महापालिकेच्या कर्मचारी वर्गावर अधिक ताण येणार असून, या व्यवस्थापनात अडचणी येण्याची शक्यता आहे.
शास्ती सवलतीमुळे करवसुलीत चारपट वाढ
महापालिकेने थकीत मालमत्ता करावरील शास्ती माफ करण्याचा निर्णय घेतल्यामुळे कर भरण्याचा वेग वाढला आहे. शास्ती माफीपूर्वी दररोज केवळ १५ ते २० लाख रुपयांचीच वसुली होत होती. मात्र, शास्ती रक्कम माफ केल्यानंतर दररोज १ कोटी रुपयांपर्यंत वसुली होत आहे. ही वसुली पूर्वीच्या तुलनेत चारपट अधिक आहे.
"बातम्यासाठी या ग्रुपमध्ये जॉईन व्हा."
पाणीपट्टी वसुलीत मोठी तफावत
मालमत्ता कराच्या तुलनेत पाणीपट्टी कराची वसुली अत्यंत कमी आहे. चालू वर्षासाठी ४६ कोटी रुपयांची मागणी असताना केवळ ७ कोटी रुपये वसूल झाले आहेत. ही वसुली केवळ १५ टक्के असल्याने महापालिकेच्या उत्पन्नावर मोठा परिणाम होत आहे. विशेष म्हणजे पाणीपट्टी करावर शास्ती आकारली जात नसल्याने नागरिक तो भरण्यास प्राधान्य देत नाहीत.
हद्दवाढ भागातून केवळ २५ टक्के वसुली
महापालिकेच्या हद्दीत समाविष्ट झालेल्या दहा गावांतील कर संकलन समाधानकारक नाही. मागील आर्थिक वर्षात येथे ६० कोटी रुपयांची कर मागणी करण्यात आली होती. मात्र, प्रत्यक्ष वसुली केवळ १६ कोटी रुपये (२५ टक्के) इतकीच झाली. यामुळे नव्या हद्दवाढ भागात विकासकामांसाठी निधी मिळवण्यात महापालिकेला अडचणी येत आहेत.
 |
| - Advertisement - |
महापालिकेची आर्थिक स्थिती सुधारायची असेल, तर नागरिकांनी कर वेळेवर भरला पाहिजे. कारण, वसुली समाधानकारक नसेल, तर शहरातील महत्त्वाची कामे रखडतील. पाणीपुरवठा, रस्ते दुरुस्ती, घनकचरा व्यवस्थापन, आरोग्य सेवा यांसारख्या मूलभूत सेवांवर त्याचा परिणाम होईल. त्यामुळे महापालिकेने लवकरात लवकर करदात्यांसोबत संवाद साधून, वसुलीत वाढ करण्याच्या उपाययोजना करणे गरजेचे आहे
– धुळे दर्पण –
(आपल्या शहराच्या प्रत्येक घडामोडींचा वार्ताहर)
(आपल्या धुळे शहराची नवी दिशा)
तुमच्या सेवा आणि सुविधांची माहिती देणारे तुमचे विश्वासू माध्यम
 |
| - Advertisement - |
