धुळे दर्पण न्यूज :- धुळे महापालिकेच्या शाळा क्रमांक ९ मध्ये शिकणाऱ्या विद्यार्थ्यांचा आणि शिक्षकांचा उत्साह आज विशेष लक्षवेधी ठरला. विविध कौशल्यांचा प्रदर्शन करणाऱ्या या विद्यार्थ्यांचे कौतुक करताना आमदार अनुप ओमप्रकाश अग्रवाल यांनी मोठी घोषणा केली – लवकरच ही शाळा डिजिटल केली जाईल!


विद्यार्थ्यांच्या गुणवत्तेवर आमदारांचा भर

  महापालिकेच्या शाळांमधील शिक्षक अत्यंत सेवाभावी वृत्तीने शिक्षण क्षेत्रात योगदान देत आहेत. अनेकदा त्यांना सहा-सहा महिने वेतन मिळत नाही, तरीही ते आपल्या विद्यार्थ्यांना घडवण्यासाठी अहोरात्र मेहनत घेत आहेत. शाळा क्रमांक ९ मधील विद्यार्थ्यांची गुणवत्ता पाहून आमदार अनुप अग्रवाल यांनी समाधान व्यक्त केले आणि या शाळेच्या विकासासाठी महत्त्वपूर्ण पावले उचलण्याचे आश्वासन दिले.

Follow the धुळे दर्पण channel on WhatsApp:

डिजिटल शिक्षणामुळे विद्यार्थ्यांना आधुनिकतेचा लाभ

  “महापालिकेच्या शाळा देखील दर्जेदार असू शकतात आणि त्या खाजगी इंग्रजी माध्यमाच्या शाळांना स्पर्धा देऊ शकतात, हे शाळा क्रमांक ९ ने दाखवून दिले आहे. याच कारणाने मी या शाळेला डिजिटल करण्याचा निर्णय घेतला आहे,” असे आमदार अग्रवाल यांनी सांगितले.

"बातम्यासाठी या ग्रुपमध्ये जॉईन व्हा."

  सध्या या शाळेत चौथीपर्यंतचे वर्ग चालवले जातात. मात्र, लवकरच इतर वर्गांचाही विस्तार केला जाईल. त्यामुळे पालकांनी आपल्या मुलांच्या शिक्षणासाठी खासगी शाळांवर अवलंबून राहण्याऐवजी महापालिकेच्या दर्जेदार शाळांमध्ये प्रवेश द्यावा, असे आवाहन आमदारांनी केले.


एन्युअल फंक्शनमध्ये विद्यार्थ्यांचे गुणदर्शन

  शाळेच्या एन्युअल फंक्शन कार्यक्रमात विद्यार्थ्यांनी नृत्य, अभिनय, वक्तृत्व आणि इतर कलागुणांचे सादरीकरण केले. छत्रपती शाहू महाराज नाट्य मंदिरात पार पडलेल्या या कार्यक्रमात विद्यार्थ्यांनी आपल्या ज्ञानाची आणि कौशल्याची झलक दाखवली.

- Advertisement -

  या कार्यक्रमाच्या निमित्ताने आमदार अनुप अग्रवाल यांनी शाळेच्या मुख्याध्यापकांसह सर्व शिक्षकांचे मनःपूर्वक आभार मानले आणि त्यांच्या सेवाभावी कार्याला शुभेच्छा दिल्या.


महापालिकेच्या शाळांचा दर्जा उंचावण्याचा संकल्प

  धुळे शहरातील महापालिका शाळा केवळ नावापुरत्या राहू नयेत, तर त्या आधुनिक आणि गुणवत्तापूर्ण शिक्षण देणाऱ्या शाळा बनाव्यात, यासाठी आमदार अग्रवाल सातत्याने प्रयत्नशील आहेत. “जेव्हा एखादा पालक आपले मूल नामांकित इंग्रजी शाळेत दाखल करण्यासाठी मदतीसाठी माझ्याकडे येईल, तेव्हा मी त्याला महापालिकेच्या शाळा क्रमांक ९ मध्ये प्रवेश घेण्याचा सल्ला देईन. कारण ही शाळा खाजगी शाळांना टक्कर देण्यास सक्षम आहे,” असेही त्यांनी स्पष्ट केले.


   धुळे महापालिकेच्या शाळांचा दर्जा उंचावून विद्यार्थ्यांना डिजिटल शिक्षणाच्या प्रवाहात आणण्याचा संकल्प त्यांनी व्यक्त केला आहे. त्यामुळे मनपा शाळा क्रमांक ९ च्या डिजिटल शिक्षण प्रवासाकडे आता संपूर्ण शहराचे लक्ष लागले आहे.

– धुळे दर्पण – 

(आपल्या शहराच्या प्रत्येक घडामोडींचा वार्ताहर)

(आपल्या धुळे शहराची नवी दिशा)

तुमच्या सेवा आणि सुविधांची माहिती देणारे तुमचे विश्वासू माध्यम