धुळे दर्पण न्यूज :- धुळे शहराचे आमदार अनुप अग्रवाल यांच्या सुचनेनुसार धुळे महापालिकेने शहरातील वर्दळीच्या ठिकाणी नागरिकांसाठी आर.ओ. तंत्रज्ञानाद्वारे शुद्ध आणि थंड पाणी उपलब्ध करून देण्याचा निर्णय घेतला आहे. आज झालेल्या महासभेत हा प्रस्ताव मंजूर करण्यात आला. यासोबतच स्वच्छ भारत मिशन अंतर्गत शहरातील शौचालय बांधणीसाठी मुदतवाढ देण्यात आली आहे. तसेच आद्यपत्रकार बाळशास्त्री जांभेकर यांच्या जयंतीनिमित्त त्यांच्या प्रतिमेस अभिवादन करण्यात आले.
Follow the धुळे दर्पण channel on WhatsApp:
महापालिका प्रशासनाधी १२वी महासभा महापालिका प्रशासक तथा आयुक्त अमित दगडे पाटील यांच्या अध्यक्षतेखाली पार पडली. यामध्ये शहरातील विविध विकास कामे आणि महापालिकेच्या कारभारासंदर्भात महत्त्वाचे निर्णय घेण्यात आले.
शहरातील स्वच्छता आणि शौचालय प्रकल्पांना मुदतवाढ
धुळे महापालिका हद्दीतील स्वच्छ महाराष्ट्र अभियान २.० अंतर्गत सामुदायिक शौचालयांच्या पुनर्बांधणीस मंजुरी देण्यात आली आहे. पूर्वी बांधलेल्या शौचालयांची दुरुस्ती करणे, नवीन सामुदायिक शौचालय उभारणे आणि मनपा शाळांमधील शौचालयांचे बांधकाम करण्यासाठी शासनाकडून प्राप्त निधीचा विनियोग निश्चित करण्यात आला आहे. सदर बांधकाम अपूर्ण असल्याने त्यासाठी एक वर्षाची मुदतवाढ मंजूर करण्यात आली आहे.
पाणपोईंसाठी आर.ओ. यंत्रणा
आमदार अनुप अग्रवाल यांनी शहरातील पाणपोईच्या ठिकाणी आर.ओ. यंत्रणा बसवण्याची मागणी केली होती. नागरिकांना केवळ १ रुपयात एक लिटर प्रमाणे शुद्ध पाणी मिळावे, यासाठी महापालिकेने ही योजना अमलात आणण्याचा निर्णय घेतला आहे. शहरातील वर्दळीच्या ठिकाणी प्रायोगिक तत्वावर हा उपक्रम राबवला जाणार असून, त्याचा सकारात्मक प्रतिसाद मिळाल्यास तो आणखी विस्तारित केला जाणार आहे.
नगररचना विभागातील सुधारणा आणि महसूलवाढ
महापालिकेच्या नगररचना विभागामार्फत विविध प्रयोजनार्थ दिल्या जाणाऱ्या दाखल्यांसाठी आणि छाननी शुल्काच्या दरांमध्ये सुधारणा करण्यात आली आहे. त्यामुळे महसूल वाढीला मदत होईल, अशी अपेक्षा आहे.
"बातम्यासाठी या ग्रुपमध्ये जॉईन व्हा."
शितल कॉलनीतील अभ्यासिकेचा प्रश्न तहकूब
शितल कॉलनी येथे महापालिकेने उभारलेली अभ्यासिका मंजुश्री सेवा समिती या संस्थेला भाडे कराराने चालविण्यास देण्याची मागणी करण्यात आली होती. मात्र, मालमत्ता हस्तांतरण आणि कायदेशीर तरतुदींचा अभ्यास केल्यानंतरच हा निर्णय घेण्यात येईल, असे सांगत हा विषय तहकूब करण्यात आला आहे.
कर्मचाऱ्यांच्या सेवासंबंधी निर्णय
मनपा रोजंदारी वर्ग ४ कर्मचारी श्रीमती योगिता रमेश घोडके यांना कायम सेवेत सामावून घेण्याच्या विषयावर चर्चा झाली, मात्र तो विषयही तहकूब करण्यात आला. यासोबतच काही कर्मचाऱ्यांच्या कार्यप्रदर्शनाबाबत तक्रारी येत असल्याने आयुक्तांनी याबाबत कठोर भूमिका घेतली. काम न करणाऱ्या कर्मचाऱ्यांना वठणीवर आणले जाईल, तसेच दादागिरी करणाऱ्या व्यक्तींवर कारवाई केली जाईल, असा स्पष्ट इशारा त्यांनी दिला आहे. काही अधिकाऱ्यांकडे अतिरिक्त जबाबदाऱ्या असल्यास त्या काढून घेतल्या जातील, असेही आयुक्तांनी सांगितले.
 |
| - Advertisement - |
धुळे महापालिकेच्या महासभेत घेतलेले हे निर्णय शहराच्या विकासास चालना देणारे ठरणार आहेत. नागरिकांसाठी आर.ओ. पाण्याची सुविधा, स्वच्छतेसाठी उभारण्यात येणाऱ्या शौचालयांना मिळालेली मुदतवाढ आणि नगररचना विभागातील सुधारणा यामुळे शहराच्या नागरी सुविधांमध्ये मोठी सुधारणा होईल. तसेच, कर्मचारी व्यवस्थापनासंदर्भात घेतलेले निर्णय महापालिकेच्या कार्यक्षमतेत वाढ करण्यास मदत करतील.
या महासभेत शहराच्या सर्वांगीण विकासावर भर देत निर्णय घेण्यात आल्याने नागरिकांमध्ये समाधानाचे वातावरण आहे.
– धुळे दर्पण –
(आपल्या शहराच्या प्रत्येक घडामोडींचा वार्ताहर)
(आपल्या धुळे शहराची नवी दिशा)
तुमच्या सेवा आणि सुविधांची माहिती देणारे तुमचे विश्वासू माध्यम
 |
| - Advertisement - |
