धुळे दर्पण न्यूज :- इंडियन अकॅडमी ऑफ पीडियाट्रिक्सच्या महाराष्ट्र शाखेच्या वतीने आयोजित राज्यस्तरीय मध्य सत्र उन्हाळी अधिवेशन ‘खान्देशकॉन’ यंदा प्रथमच धुळे शहरात आयोजित करण्यात आले आहे. दोन दिवसीय हे अधिवेशन दिनांक १९ व २० एप्रिल रोजी हॉटेल स्वर्ण स्पर्श येथे संपन्न होणार आहे. अधिवेशनाच्या आयोजनाबाबत माहिती देण्यासाठी अध्यक्ष डॉ. संजय जोशी आणि आयोजन सचिव डॉ. महेश अहिरराव यांनी पत्रकार परिषदेत सविस्तर माहिती दिली.
Follow the धुळे दर्पण channel on WhatsApp:
या परिषदेमध्ये राज्यभरातील सुमारे ३०० ते ४०० बालरोगतज्ञ सहभागी होणार असून, विशेषतः खानदेशातील – धुळे, जळगाव, नंदुरबार व नाशिक जिल्ह्यांमधील बालरोग तज्ज्ञांसाठी ही परिषद अत्यंत उपयुक्त ठरणार आहे. ‘खान्देशकॉन’ या नावाने ही परिषद ओळखली जाणार असून, धुळे जिल्ह्यात पहिल्यांदाच अशा स्वरूपाचे अधिवेशन होत आहे.
 |
| - Advertisement - |
लसीकरणावर भर: पहिल्या दिवशी चर्चा
अधिवेशनाच्या पहिल्या दिवशी लहान मुलांमध्ये दिल्या जाणाऱ्या विविध लशी, त्यांचे फायदे, साईड इफेक्ट्स, तसेच नव्या लशी यावर सखोल चर्चा केली जाणार आहे. या चर्चेसाठी संभाजीनगर येथून सुप्रसिद्ध बालरोगतज्ञ डॉ. गणेश कुलकर्णी आणि डॉ. राजेंद्र वैद्य यांच्यासह त्यांच्या टीमचे व्याख्यान होणार आहे. याशिवाय डॉ. पंकज अग्रवाल, डॉ. ऋषी लोदाया, डॉ. विजय बढे व डॉ. निवेदिता पाटील हेही मार्गदर्शन करणार आहेत.
https://whatsapp.com/channel/"बातम्यासाठी या ग्रुपमध्ये जॉईन व्हा."
गंभीर आजारांवर लक्ष: दुसऱ्या दिवशी चर्चासत्र
दुसऱ्या दिवशी अधिवेशनात लहान मुलांमधील गंभीर आजारांवर चर्चा केली जाणार आहे. यामध्ये हृदयरोग, स्थूलपणा, कावीळ, बालदमा, रक्तस्त्राव, गंभीर न्यूमोनिया यांसारख्या आजारांचा समावेश आहे. यासाठी देशभरातून तज्ज्ञ व्याख्याते उपस्थित राहणार असून, कोलकात्याहून राष्ट्रीय खजिनदार डॉ. अताणु भद्रा यांचेही विशेष मार्गदर्शन मिळणार आहे.
सन्माननीय परिसंवाद
या परिषदेत दोन महत्त्वपूर्ण परिसंवाद आयोजित करण्यात आले आहेत. एक सुप्रसिद्ध बालरोगतज्ञ डॉ. बी. के. काबरे यांच्या नावाने आणि दुसरा धुळ्याचे पहिले बालरोगतज्ञ डॉ. जी. आर. आगीवाल यांच्या स्मरणार्थ घेतला जाणार आहे.
संघटनेचा छोटा आकार, मोठे योगदान
महाराष्ट्र राज्य बालरोग परिषद अध्यक्ष डॉ. संजय वाघमोडे, सचिव डॉ. अमोल पवार, आणि ट्रेझरर डॉ. रविंद्र सोनवणे यांचे मार्गदर्शन आणि सहकार्य या संपूर्ण आयोजनास लाभले आहे. यशस्वी आयोजनासाठी डॉ. महेश अहिरराव, डॉ. जगदीश पाखरे, डॉ. तुषार कानडे, डॉ. दादाभाई पाटील यांच्यासह अनेक बालरोगतज्ञ सातत्याने परिश्रम घेत आहेत.
 |
| - Advertisement - |
उद्दिष्ट – ज्ञानवृद्धी आणि नव्या दिशेचा शोध
या परिषदेमुळे खानदेशातील बालरोग तज्ज्ञांना नव्या उपचारपद्धती, संशोधन, आणि अद्ययावत माहितीची जोड मिळेल. याचा परिणाम त्यांच्या वैद्यकीय सेवेमध्ये दर्जात्मक सुधारणा होण्यासाठी होणार आहे. बालरोग उपचाराच्या क्षेत्रातील हे अधिवेशन एक ऐतिहासिक पाऊल म्हणून गणले जात असून, धुळे जिल्ह्यासाठी हे एक अभिमानास्पद क्षण आहे.
– धुळे दर्पण –
(आपल्या शहराच्या प्रत्येक घडामोडींचा वार्ताहर)
(आपल्या धुळे शहराची नवी दिशा)
तुमच्या सेवा आणि सुविधांची माहिती देणारे तुमचे विश्वासू माध्यम
