धुळे दर्पण न्यूज :- यंदाच्या शैक्षणिक वर्षात महाराष्ट्र राज्य माध्यमिक व उच्च माध्यमिक शिक्षण मंडळाकडून दहावी व बारावीच्या परीक्षा अपेक्षेपेक्षा लवकर पार पडल्या. यामुळे यावर्षी निकालही लवकर लागण्याची शक्यता असून, विद्यार्थ्यांसाठी ही एक दिलासादायक बातमी ठरत आहे.

Follow the धुळे दर्पण channel on WhatsApp:

  बारावीची परीक्षा ११ फेब्रुवारीपासून १८ मार्चदरम्यान तर दहावीची परीक्षा २१ फेब्रुवारीपासून घेण्यात आली होती. संपूर्ण राज्यभरातील विविध विभागांमध्ये परीक्षा केंद्रांवर ही प्रक्रिया सुरळीत पार पडली. छत्रपती संभाजीनगर, लातूर, पुणे, नाशिक, नागपूर, कोकण, अमरावती, कोल्हापूर व मुंबई या विभागांमध्ये बारावीच्या उत्तरपत्रिकांचे तपासणी कार्य पूर्ण झाले असून, संबंधित सर्व उत्तरपत्रिका बोर्डाकडे जमा झाल्या आहेत.

- Advertisement -

  शिक्षण मंडळाच्या अधिकाऱ्यांनी दिलेल्या माहितीनुसार, यावर्षी परीक्षांचे वेळापत्रक लवकर राबवण्यात आले होते आणि त्याप्रमाणे उत्तरपत्रिका तपासणीही वेळेत पार पडली आहे. त्यामुळे बारावीचा निकाल मे महिन्याच्या तिसऱ्या आठवड्यात किंवा १५ मेच्या सुमारास लागण्याची शक्यता आहे. यासोबतच दहावीचा निकाल १७ किंवा १८ मे रोजी जाहीर होऊ शकतो, अशी माहिती सूत्रांकडून मिळाली आहे.


  या निर्णयामुळे विद्यार्थ्यांना पुढील शिक्षणासाठी प्रवेश प्रक्रियेसाठी जास्त वेळ मिळणार असून, वेळेवर निर्णय घेता येणार आहेत. प्रत्येक विभागात उत्तरपत्रिकांच्या वेळेवर तपासणीसाठी शिक्षकांकडून भरघोस सहकार्य मिळाल्याचे शिक्षण मंडळाकडून सांगण्यात आले.


  छत्रपती संभाजीनगर विभागात एकूण पाच जिल्ह्यांमध्ये बारावीची परीक्षा ४६० केंद्रांवर पार पडली. एकूण १ लाख ८५ हजार ३३० विद्यार्थ्यांनी यामध्ये सहभाग घेतला. तर लातूर विभागातील तीन जिल्ह्यांमध्ये २४९ परीक्षा केंद्रांवरून ९५ हजार ६९७ विद्यार्थ्यांनी परीक्षा दिली.


  दरम्यान, काही ठिकाणी कॉपी प्रकरणे समोर आली असून, या संदर्भातील सुनावणी शिक्षण मंडळाच्या समितीसमोर घेण्यात आली आहे. योग्य चौकशी व प्रक्रिया करून संबंधित प्रकरणांवर निर्णय देण्यात आला आहे.

"बातम्यासाठी या ग्रुपमध्ये जॉईन व्हा."

  शिक्षण मंडळाकडून अद्याप निकालाची अचूक तारीख जाहीर करण्यात आलेली नसली तरी विद्यार्थ्यांनी व पालकांनी अधिकृत संकेतस्थळावर सतत नजर ठेवावी, असे आवाहन मंडळाकडून करण्यात आले आहे.


  यंदाचा निकाल मे महिन्यात लागणार असल्याने राज्यातील लाखो विद्यार्थी व पालकांचा ताण कमी होणार आहे आणि नव्या शैक्षणिक पर्वाची सुरुवात अधिक नियोजित पद्धतीने होईल, अशी अपेक्षा व्यक्त केली जात आहे.

– धुळे दर्पण – 

(आपल्या शहराच्या प्रत्येक घडामोडींचा वार्ताहर)

(आपल्या धुळे शहराची नवी दिशा)

तुमच्या सेवा आणि सुविधांची माहिती देणारे तुमचे विश्वासू माध्यम

- Advertisement -