धुळे दर्पण न्यूज :- राज्य सरकारच्या 'लाडकी बहीण' योजनेबाबत सुरू असलेल्या चर्चांमध्ये आता अन्न व औषध प्रशासन मंत्री नरहरी झिरवळ यांनी स्पष्टीकरण दिले आहे. "लाडक्या बहिणींना २१०० रुपये देण्याची कोणतीही अधिकृत घोषणा सरकारने केली नव्हती," असे झिरवळ यांनी ठामपणे सांगितले. त्यांच्या या विधानामुळे लाडक्या बहिणींच्या नाराजीला नव्याने चालना मिळाली आहे.

Follow the धुळे दर्पण channel on WhatsApp:

  महायुतीच्या जाहीरनाम्यात 'सरकार पुन्हा सत्तेत आल्यास लाडक्या बहिणींना २१०० रुपये देऊ' असे आश्वासन दिले गेले होते. मात्र प्रत्यक्षात सरकारने १५०० रुपये देण्यास सुरुवात केली. त्यामुळे बहिणींमध्ये अस्वस्थता आणि नाराजीचे वातावरण आहे. अर्थमंत्री अजित पवार यांनी देखील "बजेट पाहून निर्णय घेऊ" असे आधीच सांगितले होते.


कलश यात्रेवेळी झिरवळ यांचे वक्तव्य

  मुक्ताईनगर येथे 'महाराष्ट्राचा अमृतकलश यात्रा' या सांस्कृतिक यात्रेच्या उद्घाटनासाठी आलेल्या झिरवळ यांना माध्यमांनी प्रश्न विचारला असता त्यांनी सांगितले की, "२१०० रुपये देण्याचे सरकारने कधीही जाहीर केले नाही. सध्या दिले जाणारे १५०० रुपये मिळाल्याने लाडक्या बहिणी समाधानी आहेत."

"बातम्यासाठी या ग्रुपमध्ये जॉईन व्हा."

  त्यांनी पुढे असेही नमूद केले की, "विरोधकांना सरकारवर टीका करायची संधी मिळाल्यामुळे ते लाडकी बहीण योजनेच्या नावावर चुकीचे अपप्रचार करत आहेत. वास्तविक परिस्थिती अशी आहे की, महिलांना नियमितपणे लाभ दिला जात आहे."


विरोधकांचा सरकारवर हल्ला

  लाडकी बहीण योजनेचा एप्रिल महिन्याचा हप्ता अद्याप अनेक महिलांच्या खात्यात जमा झालेला नाही. त्यामुळे विरोधकांनी सरकारवर टीकेची झोड उठवली आहे. "सरकारकडे आर्थिक ताकद नाही," असा आरोपही काही नेत्यांनी केला आहे.

- Advertisement -


शिंदे आणि तटकरे यांची प्रतिक्रिया

  मंत्री झिरवळ यांच्या विधानावर उपमुख्यमंत्री एकनाथ शिंदे यांनी मात्र प्रतिक्रिया देताना संयम बाळगला. "मला झिरवळ काय म्हणाले याची माहिती नाही," असे शिंदे यांनी स्पष्ट केले. तर महिला व बालकल्याण मंत्री आदिती तटकरे यांनी सांगितले की, "एप्रिल महिन्याचा हप्ता महिन्याच्या अखेरीस महिलांच्या खात्यात जमा होईल."


'लाडकी बहीण' योजना आणि राजकीय समीकरणे

  विधानसभा निवडणुकीच्या तोंडावर सुरू झालेल्या 'लाडकी बहीण' योजनेमुळे महायुतीला मोठा राजकीय फायदा झाला होता. विजयाच्या वेळी मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि अजित पवार यांनी महिलांचे विशेष आभार मानले होते. एकनाथ शिंदे यांनी तर हा विजय "लाडक्या बहिणींचा" असल्याचे जाहीरपणे म्हटले होते.


  परंतु सध्या प्रत्यक्ष लाभाच्या अंमलबजावणीत गडबड झाल्यामुळे योजनेचा हेतू आणि त्याचे राजकीय परिणाम यावर प्रश्नचिन्ह निर्माण झाले आहे.

– धुळे दर्पण – 

(आपल्या शहराच्या प्रत्येक घडामोडींचा वार्ताहर)

(आपल्या धुळे शहराची नवी दिशा)

तुमच्या सेवा आणि सुविधांची माहिती देणारे तुमचे विश्वासू माध्यम