धुळे दर्पण न्यूज :- मस्साजोग (जि. बीड) येथील सरपंच संतोष देशमुख यांच्या निर्घृण हत्येतील मुख्य आरोपी वाल्मीक कराड याला महाराष्ट्र संघटित गुन्हेगारी कायद्याखाली (मोक्का) कारवाईतून वगळण्यात आल्याने राजकीय वर्तुळात खळबळ उडाली आहे. या निर्णयावर शिवसेना नेते, माजी आमदार, कार्यसम्राट अनिल गोटे यांनी संतप्त प्रतिक्रिया व्यक्त करत फडणवीस सरकारवर गंभीर आरोप केले आहेत.

Follow the धुळे दर्पण channel on WhatsApp:

सरकार कोमात? – गोटे यांची तीव्र शब्दांत टीका

  अनिल गोटे यांनी प्रसिद्ध केलेल्या पत्रकात म्हटले आहे की, "संतोष देशमुख यांच्या हत्येप्रकरणी महाराष्ट्रभर संताप व्यक्त होत असून, बीडसह पुणे आणि धाराशिवसारख्या जिल्ह्यांमध्ये हजारोंच्या मोर्चाने सरकारकडे न्यायाची मागणी केली आहे. मात्र, सरकार कोमात गेले असून, या प्रकरणी कोणतीही ठोस पावले उचलली जात नाहीत."

- Advertisement -
  गोटे यांनी फडणवीस सरकारवर टीका करत म्हटले की, "मुख्यमंत्र्यांनी विधिमंडळात मोक्का कायदा लागू करण्याचे आश्वासन दिले होते. पण मुख्य आरोपी, ज्याच्यावर १५ गंभीर गुन्हे आहेत, त्याला वगळून सरकारने आपल्या हेतूंबाबत संशय निर्माण केला आहे."


मोक्का कायद्याचा गैरवापर?

  मोक्का कायद्याच्या कलम २(ड) अंतर्गत ज्या व्यक्तीविरोधात दोन किंवा त्याहून अधिक गंभीर गुन्हे दाखल आहेत आणि न्यायालयाने त्याची दखल घेतली आहे, त्याच्यावर मोक्का लागू होतो. सर्वोच्च न्यायालयाने अनेक वेळा स्पष्ट केले आहे की मोक्का व्यक्तीला लागू होत नाही, तर गुन्हेगारी कृत्याला लागू होतो.


  गोटे यांनी विचारले, "वाल्मीक कराडच्या विरोधात प्राणघातक हल्ला, खंडणीसारख्या १५ गंभीर गुन्ह्यांची नोंद असताना त्याला मोक्कामधून वगळण्याचा निर्णय कसा घेतला गेला? याचा अर्थ सरकार गुन्हेगारांना पाठीशी घालत आहे."

"बातम्यासाठी या ग्रुपमध्ये जॉईन व्हा."

सरकारच्या भूमिकेवर प्रश्नचिन्ह

  संतोष देशमुख यांचे कुटुंब न्यायासाठी आक्रोश करत असताना, सरकारने या प्रकरणात कोणतीही कठोर भूमिका न घेतल्याचे स्पष्ट होते. गोटे यांच्या मते, "हे कायद्याचे सरकार नसून फायद्याचे सरकार आहे. ज्यांनी गुन्हे केले त्यांना संरक्षण देऊन सामान्य जनतेला वाऱ्यावर सोडले जात आहे."


न्यायासाठी राज्यभरातील संताप

  संतोष देशमुख यांच्या हत्येनंतर बीडसह महाराष्ट्राच्या विविध भागांमध्ये निषेध मोर्चे काढले जात आहेत. हजारो लोकांनी न्यायासाठी आवाज उठवला असून, संतोष देशमुख यांचे कुटुंब केवळ दोषींवर कठोर कारवाईची मागणी करत आहे.

- Advertisement -
आंदोलनाची तयारी

  शिवसेना या प्रकरणी लवकरच मोठे आंदोलन उभारणार असल्याची घोषणा गोटे यांनी केली आहे. "जर सरकारने त्वरित कारवाई करून मोक्का कायदा लागू केला नाही, तर जनतेचा आक्रोश अधिक तीव्र होईल," असा इशारा त्यांनी दिला आहे.


सरकारच्या उत्तराकडे सर्वांचे लक्ष

  संतोष देशमुख हत्या प्रकरणी मोक्का लागू होईल का, दोषींना शिक्षा होईल का, याकडे संपूर्ण महाराष्ट्राचे लक्ष लागले आहे. फडणवीस सरकारवर प्रचंड दबाव असून, त्यांचे पाऊल पुढे काय असेल, हे पाहणे महत्त्वाचे ठरणार आहे.

– धुळे दर्पण – 

(आपल्या शहराच्या प्रत्येक घडामोडींचा वार्ताहर)

(आपल्या धुळे शहराची नवी दिशा)

तुमच्या सेवा आणि सुविधांची माहिती देणारे तुमचे विश्वासू माध्यम