धुळे दर्पण न्यूज :- शहरातील नागरिकांसाठी मोठी दिलासादायक बातमी आहे. धुळे महानगरपालिकेने १८ मार्च ते ३१ मार्च २०२५ या कालावधीत १००% शास्तीमाफी योजना लागू केली आहे. त्यामुळे थकबाकीदार मालमत्ता धारकांना शास्तीच्या भारातून मुक्तता मिळणार आहे. या निर्णयामुळे अनेक नागरिकांनी समाधान व्यक्त केले आहे.
शास्तीमाफी मागणीचा इतिहास
महापालिका प्रशासनाकडून थकीत मालमत्ता कर वसुलीच्या मोहिमा हाती घेण्यात येत आहेत. मात्र, शास्तीसह कर भरणे अनेकांना कठीण जात असल्यामुळे नागरिकांनी थेट आमदार अनुप अग्रवाल यांच्याकडे शास्तीमाफीची मागणी केली. अग्रवाल यांनी नागरिकांच्या मागणीची दखल घेत मनपा आयुक्त तथा प्रशासक अमिता दगडे-पाटील यांना पत्र पाठवले. तसेच, प्रत्यक्ष भेट घेऊन शास्तीमाफी देण्याची विनंती केली.
Follow the धुळे दर्पण channel on WhatsApp:
महापालिका हद्दीतील हजारो नागरिक मोठ्या प्रमाणात थकबाकीदार आहेत. काही ठिकाणी मनपाने थेट मालमत्तेच्या जप्तीची कारवाईदेखील सुरू केली होती. त्यामुळे नागरिकांमध्ये भीतीचे वातावरण निर्माण झाले होते. अशा परिस्थितीत, आ. अनुप अग्रवाल यांनी तातडीने हस्तक्षेप करून शास्तीमाफीसाठी प्रयत्न केले. त्यांच्या पाठपुराव्यामुळे अखेर महापालिका प्रशासनाने १००% शास्तीमाफी जाहीर केली आहे.
थकबाकीदारांची संख्या आणि थकबाकीचे प्रमाण
महापालिकेच्या हद्दीत तसेच हद्दवाढ भागात मोठ्या प्रमाणावर मालमत्ता कर थकबाकी आहे. खालील आकडेवारीनुसार थकबाकीचे प्रमाण स्पष्ट होते:
हद्दवाढ भागातील थकबाकीदार:
५७१ मालमत्ता धारकांकडे ₹१ लाखांपेक्षा जास्त कर थकीत असून, यात ₹६.५१ कोटी शास्ती आणि ₹२४.५२ कोटी मूळ रक्कम आहे.
२४९५ मालमत्ता धारकांकडे ₹५० हजार ते ₹१ लाखांपर्यंत थकबाकी असून, यात ₹४.५७ कोटी शास्ती आणि ₹१६.४५ कोटी मूळ रक्कम आहे.
१४,१०८ मालमत्ता धारकांकडे ₹१ हजार ते ₹५० हजारांपर्यंत थकबाकी असून, यात ₹४.९४ कोटी शास्ती आणि ₹२६.९८ कोटी मूळ रक्कम आहे.
"बातम्यासाठी या ग्रुपमध्ये जॉईन व्हा."
महानगरपालिका मूळ हद्दीतील थकबाकीदार:
६३४ मालमत्ता धारकांकडे ₹१ लाखांपेक्षा जास्त कर थकीत असून, यात ₹१०.६५ कोटी शास्ती आणि ₹९.४८ कोटी मूळ रक्कम आहे.
१८,८८८ मालमत्ता धारकांकडे ₹५० हजार ते ₹१ लाखांपर्यंत थकबाकी असून, यात ₹८.३० कोटी शास्ती आणि ₹५.४२ कोटी मूळ रक्कम आहे.
४३,९४५ मालमत्ता धारकांकडे ₹१ हजार ते ₹५० हजारांपर्यंत थकबाकी असून, यात ₹२२.६२ कोटी शास्ती आणि ₹२७.३३ कोटी मूळ रक्कम आहे.
 |
| - Advertisement - |
महापालिकेने स्पष्ट केले आहे की, ३१ मार्च २०२५ पर्यंत थकीत मालमत्ता कर भरणाऱ्या नागरिकांना १००% शास्तीमाफीचा लाभ मिळेल. यासाठी नागरिकांनी महापालिकेच्या संबंधित विभागाशी संपर्क साधून लवकरात लवकर कर भरणा करावा.
१ एप्रिलपासून कठोर कारवाईचा इशारा
महापालिका प्रशासनाने स्पष्ट केले आहे की, ३१ मार्चपर्यंत थकीत मालमत्ता कर न भरल्यास १ एप्रिलपासून कठोर कारवाई केली जाईल. महाराष्ट्र महानगरपालिका अधिनियमातील तरतुदीनुसार थकबाकीदारांच्या मालमत्तेचा जाहीर लिलाव केला जाईल. तसेच, मनपाचे नाव लावण्याची कारवाई केली जाईल.
आ. अनुप अग्रवाल यांचे नागरिकांना आवाहन
"शास्तीमाफीसाठी नागरिकांनी मागणी केली होती, ती मी मनपा प्रशासनापर्यंत पोहोचवली आणि त्याला सकारात्मक प्रतिसाद मिळाला. आता धुळेकरांनी या संधीचा लाभ घ्यावा आणि शक्य तितक्या लवकर थकीत कर भरावा," असे आ. अनुप अग्रवाल यांनी सांगितले.
नागरिकांचा सकारात्मक प्रतिसाद
शास्तीमाफीच्या निर्णयामुळे नागरिकांमध्ये समाधानाचे वातावरण आहे. अनेकांनी आ. अनुप अग्रवाल आणि महापालिका प्रशासनाचे आभार मानले आहेत.
– धुळे दर्पण –
(आपल्या शहराच्या प्रत्येक घडामोडींचा वार्ताहर)
(आपल्या धुळे शहराची नवी दिशा)
तुमच्या सेवा आणि सुविधांची माहिती देणारे तुमचे विश्वासू माध्यम
 |
| - Advertisement - |
