धुळे दर्पण न्यूज :- सामान्य नागरिकांच्या तक्रारीवर कायदेशीर चौकशी व कारवाई करण्याचे जबाबदार काम सोपवले गेलेला एक पोलिस पाटीलच जर लाच मागू लागला, तर न्याय व पारदर्शकतेवरचा विश्वासच डळमळीत होतो. अशीच एक गंभीर घटना साक्री तालुक्यातील बळसाणे गावात घडली असून, पोलिस पाटील आनंदा भटा पाटील यांनी पोलिस चौकशीसंदर्भातील एका प्रकरणात तडजोडीअंती लाचेच्या स्वरूपात आठ हजार रुपयांची मागणी केल्याचे उघड झाले आहे. यापैकी दोन हजार रुपयांचा पहिला हप्ता स्वीकारताना त्यांना लाचलुचपत प्रतिबंधक विभागाच्या (ACB) पथकाने रंगेहाथ पकडले.
Follow the धुळे दर्पण channel on WhatsApp:
प्रकरणाचे सविस्तर विवरण असे की, बळसाणे गावातील एका नागरिकाच्या पत्नीने पोलिस ठाण्यात एक तक्रार दाखल केली होती. या तक्रारीचा लवकरात लवकर तपास करून दोषारोपपत्र न्यायालयात दाखल करण्यात यावे, यासाठी पोलिस पाटील आनंदा भटा पाटील यांनी तक्रारदाराकडे तब्बल १० हजार रुपयांची मागणी केली होती. ही रक्कम देण्यास तक्रारदार तयार नव्हता आणि त्याने थेट लाचलुचपत प्रतिबंधक विभागाकडे धाव घेतली.
यावर ACB विभागाने तत्काळ तपासणी करून सापळा रचला. दोघांमध्ये झालेल्या तडजोडीनुसार आठ हजार रुपये देण्याचे ठरले आणि यातील दोन हजार रुपयांचा पहिला हप्ता दिला जात असताना पोलिस पाटील आनंदा पाटील यांना रंगेहाथ पकडण्यात आले. या कारवाईत लाचलुचपत प्रतिबंधक विभागाचे उपअधीक्षक सचिन साळुंके, निरीक्षक पंकज शिंदे, कर्मचारी राजन कदम व त्यांच्या पथकाने मोलाची भूमिका बजावली.
 |
| - Advertisement - |
याप्रकरणी निजामपूर पोलिस ठाण्यात भारतीय दंड विधान व भ्रष्टाचार प्रतिबंधक कायद्यान्वये गुन्हा दाखल करण्यात आला आहे. अटक करण्यात आलेल्या पोलिस पाटलाला बुधवारी दुपारी न्यायालयात हजर करण्यात आले असता, न्यायालयाने त्यास गुरुवारपर्यंत पोलिस कोठडी सुनावली आहे. पोलिस प्रशासनाकडून मिळालेल्या माहितीनुसार, या प्रकरणाचा पुढील तपास सुरू असून, आणखी काही बाबींचा खुलासा होण्याची शक्यता नाकारता येत नाही.
या प्रकारामुळे गावात आणि परिसरात मोठी खळबळ उडाली असून, एक जबाबदार पदावर असणाऱ्या व्यक्तीने स्वतःच कायद्याचे उल्लंघन केल्याने नागरिकांमध्ये नाराजीचे वातावरण आहे. पोलिस पाटील हा गावातील कायदा व सुव्यवस्था राखण्यासाठी नियुक्त केलेला प्रतिनिधी असतो. अशा व्यक्तींकडून लाच मागितली जाणे ही अत्यंत गंभीर बाब मानली जात आहे.
"बातम्यासाठी या ग्रुपमध्ये जॉईन व्हा."
लाचलुचपत प्रतिबंधक विभागाच्या या तत्पर कारवाईमुळे भ्रष्टाचारास आळा घालण्यास मदत होईल, अशी अपेक्षा व्यक्त केली जात आहे. एकीकडे प्रशासन भ्रष्टाचारमुक्त यंत्रणा तयार करण्यासाठी प्रयत्नशील आहे, तर दुसरीकडे काही अधिकारी व कर्मचारी आपली जबाबदारी विसरून लोकांकडून अवैध पैसा उकळण्याचा मार्ग पत्करत आहेत. अशा प्रवृत्तींचा बंदोबस्त करण्यासाठी कठोर कारवाईची आवश्यकता असल्याचे मत स्थानिक नागरिक व सामाजिक कार्यकर्त्यांकडून व्यक्त करण्यात येत आहे.
– धुळे दर्पण –
(आपल्या शहराच्या प्रत्येक घडामोडींचा वार्ताहर)
(आपल्या धुळे शहराची नवी दिशा)
तुमच्या सेवा आणि सुविधांची माहिती देणारे तुमचे विश्वासू माध्यम
 |
| - Advertisement - |
