धुळे दर्पण न्यूज :- राज्यातील दहावीच्या परीक्षेचा निकाल लागल्यानंतर आता विद्यार्थ्यांची नजर अकरावीच्या प्रवेश प्रक्रियेवर लागून आहे. धुळे जिल्ह्यातील विद्यार्थ्यांसाठी एक आनंदाची बातमी आहे की, अकरावीच्या नव्या ऑनलाइन प्रवेश प्रक्रियेची औपचारिक सुरुवात आज सोमवार (दि. २६ मे) पासून होत आहे. यंदा जिल्ह्यातील १६८ कनिष्ठ महाविद्यालयांमध्ये एकूण २७,२९० जागा उपलब्ध असून, दहावी उत्तीर्ण २४,४२० विद्यार्थ्यांनाच प्रवेश घ्यायचा असल्यामुळे कोणताही विद्यार्थी प्रवेशापासून वंचित राहणार नाही, अशी ग्वाही शिक्षण विभागाने दिली आहे.

- Advertisement -

ऑनलाइन प्रवेश प्रक्रियेचे टप्पे :


राज्य शासनाच्या नव्या निर्णयानुसार यंदा अकरावीची प्रवेश प्रक्रिया पूर्णतः ऑनलाइन पद्धतीने राबवण्यात येणार आहे. यासाठी कॉलेज नोंदणी १६ मेपर्यंत पूर्ण झाली होती. तसेच १९ व २० मे रोजी विविध शाळांमध्ये मार्गदर्शन शिबिरे घेण्यात आली. परंतु तांत्रिक अडचणींमुळे पूर्वनियोजित वेळापत्रकात विलंब झाला. अखेर ही प्रक्रिया आजपासून पुन्हा सुरू करण्यात आली आहे.


प्रवेश प्रक्रिया पुढीलप्रमाणे असेल:


• २६ मे ते ३ जून: विद्यार्थ्यांची ऑनलाइन नोंदणी व महाविद्यालय पसंतीक्रम नोंदवणे.


• ५ जून: तात्पुरती गुणवत्ता यादी जाहीर.


• ६ व ७ जून: हरकती व त्यावर निर्णय.


• ८ जून: अंतिम गुणवत्ता यादी प्रसिद्ध.


• ९ ते ११ जून: पहिल्या फेरीतील प्रवेश प्रकिया.


• २० जून: दुसऱ्या फेरीसाठी रिक्त जागांची यादी प्रसिद्ध होणार.



कॉपीमुक्त मोहीमेचा परिणाम : निकालात घट


यंदा राज्य सरकारच्या ‘कॉपीमुक्त अभियान’मुळे परीक्षेतील फसवणूक थांबली असली तरी, त्याचा थेट परिणाम दहावीच्या निकालावर झाला आहे. धुळे जिल्ह्यात निकालाची टक्केवारी अन्य जिल्ह्यांच्या तुलनेत कमी लागली आहे. तरीही मिळालेल्या आकडेवारीनुसार, २४ हजार ४२० विद्यार्थी दहावीत उत्तीर्ण झाले असून, त्यांना अकरावीसाठी प्रवेश घेण्याची संधी आहे.


महत्त्वाचे : पसंतीक्रम आणि गुणवत्ता यादीवर भर


प्रवेश प्रक्रिया ही पूर्णपणे पारदर्शक असून, विद्यार्थ्यांनी दिलेल्या महाविद्यालय पसंतीक्रम व गुणांच्या आधारेच प्रवेश निश्चित होणार आहे. यासाठी विद्यार्थ्यांनी प्रत्येक फेरीपूर्वी आपले पसंतीक्रम अद्ययावत ठेवावेत, असे आवाहन शिक्षण विभागाने केले आहे. आरक्षण व प्रवाहनिहाय पात्रतेनुसार कॉलेज वाटप होणार आहे.


ग्रामीण विद्यार्थ्यांना तांत्रिक अडचणींचा सामना


अकरावी प्रवेश प्रक्रिया ऑनलाइन स्वरूपाची असल्यामुळे ग्रामीण भागातील विद्यार्थ्यांना मोबाइल रेंज व इंटरनेट कनेक्टिव्हिटी अभावी अडचणींचा सामना करावा लागत आहे. त्यामुळे अनेक विद्यार्थी सायबर कॅफे किंवा शहरातील ठिकाणांवर येऊन फॉर्म भरत आहेत. या पार्श्वभूमीवर, स्थानिक प्रशासनाने विशेष हेल्पडेस्क किंवा सुविधा केंद्रे सुरू करण्याची मागणी वाढीस लागली आहे.



महत्वाचा इशारा:

कोणतीही माहिती चुकीची भरू नये. एकदा पसंतीक्रम निश्चित केल्यानंतर ते तपासून 'सबमिट' करावे. वेळापत्रकाचे काटेकोर पालन करणे आवश्यक आहे. अधिक माहितीसाठी mahahsscboard.in किंवा mahadmeadmission.org या अधिकृत संकेतस्थळावर भेट द्यावी.