धुळे दर्पण न्यूज :- राज्यातील राजकारण पुन्हा एकदा खळबळजनक घडामोडींनी ढवळून निघाले आहे. धुळे जिल्हा दौऱ्यावर आलेल्या विधिमंडळ अंदाज समितीला ‘खुश’ करण्यासाठी राज्य सरकारच्या एका कॅबिनेट मंत्र्याच्या वतीने सुमारे साडेपाच कोटी रुपयांची रोकड धुळे येथील शासकीय विश्रामगृहातील रूम नंबर १०२ मध्ये जमा करण्यात आल्याचा गंभीर आरोप करण्यात आला आहे.

Follow the धुळे दर्पण channel on WhatsApp:

  शिवसेनेचे माजी आमदार अनिल गोटे यांच्या नेतृत्वाखाली शिवसेनेच्या शिष्टमंडळाने संबंधित खोलीवर धडक दिल्यानंतर, खोलीत उपस्थित असलेले संबंधित मंत्र्यांचे वैयक्तिक सहाय्यक (पीए) खोलीला कुलूप लावून पळून गेले, अशी माहिती संजय राऊत यांनी ट्विटद्वारे सार्वजनिक केली आहे.

- Advertisement -

  राऊत यांच्या ट्विटमध्ये म्हटले आहे की, "धुळे विश्रामगृहात काही दिवसांपासून एका कॅबिनेट मंत्र्याच्या वतीने वसुली सुरू होती. आज संध्याकाळी अनिल गोटे यांच्या नेतृत्वाखाली शिवसैनिकांनी धडक दिल्यानंतर पीए पळून गेले. खोलीत किमान पाच कोटी रुपये आहेत. जिल्हाधिकाऱ्याच्या उपस्थितीत खोली उघडावी एवढीच अपेक्षा होती, पण प्रशासनातर्फे कोणीही पुढे येत नाही."


  शिवसेना जिल्हा प्रमुख अतुल सोनवणे, उपजिल्हा प्रमुख नरेंद्र परदेशी, महानगर प्रमुख धीरज पाटील यांच्यासह इतर पदाधिकाऱ्यांनी सदर खोलीवर नजर ठेवत असून, प्रशासन, पोलीस, आणि लाचलुचपत प्रतिबंधक विभागाकडून (ACB) कोणतेही ठोस पाऊल उचलण्यात आलेले नाही, ही बाब अधिक धक्कादायक आहे.

- Advertisement -

  या "मलिद्याच्या रकमेचा" संबंध विकासकामातील भ्रष्टाचाराशी असल्याचा संशय व्यक्त करण्यात येत असून, हा पैसे विधिमंडळ अंदाज समितीच्या अध्यक्षपदावर असलेल्या शिंदे गटाचे आमदार अर्जुन खोतकर यांच्या समितीसाठी ठेवण्यात आला होता, असेही आरोप आहेत.


  संजय राऊत यांनी प्रश्न उपस्थित केला आहे की, "उद्धव ठाकरे यांचे सरकार का पाडण्यात आले? हा महाराष्ट्र लुटण्यासाठीच का?" असा गंभीर सवाल करून त्यांनी सत्ताधाऱ्यांवर सरळ सरळ 'चोरांचे सरकार, चोरांना संरक्षण' असा आरोप केला आहे.

"बातम्यासाठी या ग्रुपमध्ये जॉईन व्हा."

  सध्या ही घटना धुळे जिल्ह्यात खळबळ उडवणारी ठरली आहे. विरोधी पक्षांनी या प्रकरणाची उच्चस्तरीय चौकशी करून संबंधितांवर कारवाई करण्याची मागणी केली आहे. मात्र, प्रशासनाच्या दुर्लक्षामुळे जनतेच्या मनात संशय अधिक गडद होतो आहे.

- Advertisement -

  याप्रकरणी आणखी माहिती आणि तपशील समोर येत असून, धुळे शासकीय यंत्रणा आणि राज्य सरकारवर मोठा दबाव निर्माण झाला आहे.

---

स्रोत : संजय राऊत यांचे अधिकृत ट्विट, स्थानिक शिवसेना नेते आणि प्रत्यक्षदर्शींची माहिती

– धुळे दर्पण – 

(आपल्या शहराच्या प्रत्येक घडामोडींचा वार्ताहर)

(आपल्या धुळे शहराची नवी दिशा)

तुमच्या सेवा आणि सुविधांची माहिती देणारे तुमचे विश्वासू माध्यम

- Advertisement -