धुळे दर्पण न्यूज :- गुलमोहर रेस्ट हाऊसमधील कथित रोकड प्रकरणाला आज तब्बल एक महिना उलटून गेला आहे. २२ मे २०२५ रोजी धुळे शहरातील गुलमोहर रेस्ट हाऊसच्या खोली क्रमांक १०२ मध्ये माजी आमदार आणि ठाकरे गटाचे ज्येष्ठ नेते अनिल गोटे यांच्या उपस्थितीत पोलिसांनी छापा टाकून १ कोटी ८४ लाख रुपयांची रोकड जप्त केली होती. या रोख रकमेचा संबंध अंदाज समितीच्या प्रस्तावित भेटीशी असल्याचा आरोप अनिल गोटे यांनी केला होता. मात्र, या गंभीर प्रकरणावर आतापर्यंत कोणतीही ठोस कारवाई झालेली नसल्यामुळे ठाकरे गट आक्रमक झाला आहे.

अदखलपात्र गुन्ह्यावरच सरकार थांबले; कारवाईचा मागमूस नाही

  या प्रकरणात केवळ अदखलपात्र गुन्हा नोंदवण्यात आला आहे, ज्यामुळे या घटनेचे गांभीर्य दडपण्याचा प्रयत्न केला जात असल्याचा आरोप ठाकरे गटाकडून करण्यात येत आहे. शिवसेना (ठाकरे गट) यांनी या प्रकरणात राज्य सरकारवर प्रशासनिक निष्क्रियतेचे आणि संभाव्य राजकीय संरक्षणाचे आरोप करत जोरदार आंदोलन छेडले आहे.

- Advertisement -

महाराणा प्रताप चौकात धरणे आंदोलन; SIT प्रमुखाचे नाव जाहीर न झाल्याने संताप

  आज (२२ जून) रोजी धुळे शहरातील जुनी महानगरपालिका समोरील महाराणा प्रताप चौकात ठाकरे गटाच्या वतीने धरणे आंदोलन करण्यात आले. या आंदोलनाच्या वेळी आंदोलकांनी जोरदार घोषणा देत "हे प्रकरण सरकार दडपण्याचा प्रयत्न करत आहे", असा स्पष्ट आरोप केला. तसेच, SIT (विशेष तपास पथक) नेमण्याचा निर्णय जाहीर करण्यात आला असला तरी त्याच्या प्रमुखाचे नाव अद्याप जाहीर न झाल्याने संतप्त भावना व्यक्त करण्यात आली.

नार्को टेस्टची जोरदार मागणी; मनी लॉन्ड्रिंग, मकोका कायद्यांचा मुद्दा ऐरणीवर

  या प्रकरणी ठाकरे गटाचे उपजिल्हाप्रमुख नरेंद्र परदेशी यांनी पत्रकारांशी बोलताना सांगितले की, "१ कोटी ८४ लाख रुपयांची रक्कम जप्त होऊनही अद्याप कोणत्याही मोठ्या व्यक्तीवर कारवाई झाली नाही. उलट या प्रकरणात केवळ अदखलपात्र गुन्हा दाखल करून वेळ मारून नेण्याचा प्रयत्न सुरू आहे."

- Advertisement -

  त्यांनी पुढे सांगितले की, "या प्रकरणात मनी लॉन्ड्रिंग प्रतिबंधक कायदा (PMLA), भ्रष्टाचार प्रतिबंधक कायदा (Prevention of Corruption Act) तसेच गंभीर गुन्ह्यांसाठी लागू होणारा मकोका (MCOCA) अंतर्गत गुन्हे दाखल होणे गरजेचे होते. मात्र, अद्याप काहीही झालेले नाही."

  त्यांनी थेट आमदार अर्जुन खोतकर व त्यांचे स्वीय सहाय्यक किशोर पाटील यांच्यावर संशय व्यक्त करत दोघांची नार्को टेस्ट करावी, अशी मागणी केली.

सरकार मौन का? – जनतेचा सवाल

  या प्रकरणातील सामाजिक आणि राजकीय गुंतागुंत लक्षात घेता, संपूर्ण जिल्ह्यात एक वेगळीच चर्चा रंगली आहे. मोठ्या रकमेच्या हस्तांतरणामागे कोणाचा हात आहे? कोणत्या राजकीय हेतूने ही रक्कम ठेवण्यात आली होती? कोणाला संरक्षण दिले जात आहे? अशा प्रश्नांनी जनतेत संभ्रम निर्माण झाला आहे.

शिवसेना (ठाकरे गट) या प्रकरणात पारदर्शक चौकशी व कठोर कारवाई व्हावी यासाठी पुढील काळात आंदोलनाची व्याप्ती वाढवणार असल्याचे संकेत देत आहेत.

"बातम्यासाठी या ग्रुपमध्ये जॉईन व्हा."

राजकीय तापमान चढणार!

  धुळे शहरात निवडणुकीच्या पार्श्वभूमीवर अशा मोठ्या रोख रकमेचा स्फोटक तपास आणि त्याभोवती फिरणारे राजकीय आरोप-प्रत्यारोप पाहता, पुढील काळात धुळे जिल्ह्याचे राजकीय तापमान आणखी चढण्याची शक्यता नाकारता येत नाही.

धुळे दर्पण
मुख्य संपादक : सैय्यद सानिल
📞 बातमी व जाहिरातीसाठी संपर्क : 8087860039 / 8806680480
📩 ईमेल : dhuledarpan@gmail.com

– धुळे दर्पण – 

(आपल्या शहराच्या प्रत्येक घडामोडींचा वार्ताहर)

(आपल्या धुळे शहराची नवी दिशा)

तुमच्या सेवा आणि सुविधांची माहिती देणारे तुमचे विश्वासू माध्यम

- Advertisement -