धुळे दर्पण न्यूज :- धुळे (प्रिंप्री) "ज्ञान (Knowledge), कौशल्य (Skills) आणि वृत्ती (Attitude) या तीन गोष्टी कोणत्याही व्यक्तीच्या सर्वांगीण विकासासाठी आणि यशासाठी अत्यंत महत्त्वाच्या आहेत. हे तीन मंत्र जर क्षेत्रिय कर्मचाऱ्यांनी त्यांच्या वैयक्तिक व व्यावसायिक जीवनात आत्मसात केले, तर यश अटळ आहे," असा प्रेरणादायी संदेश आज सेवानिवृत्त होत असलेल्या नोडल ऑफिसर (स्मार्ट प्रकल्प) विनय बोरसे यांनी दिला.

Follow the धुळे दर्पण channel on WhatsApp:

आज दिनांक ३० जून रोजी प्रिंप्री येथील शासकीय फळ रोपवाटिका येथे श्री. बोरसे यांचा सेवानिवृत्ती समारंभ संपन्न झाला. त्यांच्या कार्यकाळाच्या यशस्वी पूर्णतेनिमित्त कृषी विभागाच्या विविध कार्यालयांतील अधिकारी व कर्मचारी मोठ्या संख्येने उपस्थित होते.

- Advertisement -

समारंभाच्या अध्यक्षस्थानी जिल्हा अधीक्षक कृषी अधिकारी श्री. सुरज जगताप हे होते. मंचावर तालुका कृषी अधिकारी माधुरी गायकवाड, तंत्र अधिकारी प्रियंका सोनवणे, मंडळ कृषी अधिकारी मनीषा पाटील, भालेराव बोरसे, कृषी भूषण पुरस्कार प्राप्त प्रगतशील शेतकरी दिलीप पाटील, प्रभाकर चौधरी, वसंतराव साळुंखे आदी मान्यवर उपस्थित होते.

सेंद्रिय शेतीत धुळे पॅटर्नचे निर्माते

आपल्या अध्यक्षीय भाषणात श्री. सुरज जगताप यांनी विनय बोरसे यांच्या कार्यकर्तृत्वाचा गौरव करताना सांगितले की, "सेंद्रिय शेतीमध्ये धुळे पॅटर्न ही संकल्पना राज्यापुरती मर्यादित न राहता संपूर्ण देशभरात एक ओळख बनली आहे. या यशामागे विनय बोरसे यांचे दूरदृष्टीपूर्ण विचार, सृजनशीलता आणि कामातील सातत्य यांचा मोठा वाटा आहे."

शेतकऱ्यांशी असलेली नाळ जपणारे अधिकारी

कृषी भूषण दिलीप पाटील यांनी आपल्या मनोगतात सांगितले की, "विनय बोरसे हे केवळ एक प्रशासकीय अधिकारी नव्हते, तर ते खऱ्या अर्थाने शेतकऱ्यांचे हितचिंतक होते. शेतकऱ्यांच्या अडचणींविषयीची त्यांना असलेली आस्था आणि त्या अडचणी दूर करण्याची त्यांची धडपड यामुळेच ते शेतकऱ्यांमध्ये अत्यंत लोकप्रिय झाले."

कुटुंबीय, सहकारी व शेतकऱ्यांकडून भावनिक निरोप

या समारंभात सेवानिवृत्त कृषी अधिकारी कैलास देवरे, प्रल्हाद सोनवणे, कृषी अधिकारी प्रवीण पवार, शेतीनिष्ठ शेतकरी अमृत पवार, वसंतराव साळुंखे तसेच बोरसे यांचे लहान बंधू अ‍ॅड. मिलिंद बोरसे आणि प्रा. प्रवीण बोरसे यांनी आपली भावना व्यक्त करताना, विनय बोरसे यांच्यातील संवेदनशीलता, नेतृत्वगुण, आणि कार्यशक्तीचा गौरव केला.

- Advertisement -

"माझ्या आईचे आशीर्वाद हे माझे खरे भांडार" – विनय बोरसे

स्वतःच्या मनोगतात विनय बोरसे यांनी आपल्या कुटुंबाचे, विशेषतः आईचे, सहकार्य आणि आशीर्वादाचे मनःपूर्वक कौतुक केले. "आईच्या संस्कारामुळे मी जनतेसाठी काही करू शकलो. शासकीय नोकरी ही सेवा आहे, अधिकार नव्हे, हे मी सदैव लक्षात ठेवले," असे ते म्हणाले.

स्मरण म्हणून वडाचे रोपण

कार्यक्रमाच्या शेवटी विनय बोरसे आणि त्यांच्या पत्नीच्या हस्ते प्रिंप्री प्रक्षेत्रात वडाच्या झाडाचे रोपण करण्यात आले. या वृक्षारोपणाने त्यांच्या कार्यकाळाची आठवण कायम राहील, अशी भावना कर्मचाऱ्यांनी व्यक्त केली.

कार्यक्रमाचे संयोजन जिल्हा अधीक्षक कृषी अधिकारी कार्यालय, उपविभागीय कृषी अधिकारी कार्यालय व तालुका कृषी अधिकारी कार्यालयातील कर्मचाऱ्यांनी केले होते. सूत्रसंचालन मंडळ कृषी अधिकारी बी.जे. पाटील यांनी केले.

- Advertisement -

"विनय बोरसे – एक सेवाभावी, दूरदर्शी व शेतकरीहितैषी अधिकारी"

कृषी क्षेत्रात त्यांनी दिलेले योगदान, सेंद्रिय शेतीच्या माध्यमातून उभारलेली एक वेगळी चळवळ आणि शेतकऱ्यांविषयीची कळकळ या सगळ्यामुळे विनय बोरसे यांचे नाव कृषी विभागात कायम आदराने घेतले जाईल. त्यांच्या सेवानिवृत्तीनंतरही त्यांच्या कार्याची पाऊलखुणा पुढील पिढीला प्रेरणा देत राहील, हे निश्चित!

धुळे दर्पण
मुख्य संपादक : सैय्यद सानिल
(B.Com, M.Com, M.A.MCJ)
📞 बातमी व जाहिरातीसाठी संपर्क : 8087860039 / 8806680480
📩 ईमेल : dhuledarpan@gmail.com

– धुळे दर्पण – 

(आपल्या शहराच्या प्रत्येक घडामोडींचा वार्ताहर)

(आपल्या धुळे शहराची नवी दिशा)

तुमच्या सेवा आणि सुविधांची माहिती देणारे तुमचे विश्वासू माध्यम