धुळे दर्पण न्यूज :- लोकसभा आणि महाराष्ट्र विधानसभा निवडणुकांमध्ये झालेल्या मतदार चोरीच्या आरोपांवरून शिवसेना (उद्धव बाळासाहेब ठाकरे) गटाने धुळ्यात निवडणूक आयोगाविरोधात तीव्र आंदोलन छेडले. उपनेते व संपर्कप्रमुख अशोक धात्रक यांच्या नेतृत्वाखाली आज दुपारी शहरात जोरदार निदर्शने झाली.
राहुल गांधींचा गंभीर आरोप
काही दिवसांपूर्वी काँग्रेसचे वरिष्ठ नेते व लोकसभेतील विरोधी पक्षनेते राहुल गांधी यांनी “मतदान चोरीचे ठोस पुरावे आमच्याकडे आहेत” असा दावा केला होता. गुरुवारी आयोजित पत्रकार परिषदेत त्यांनी या संदर्भातील आकडेवारी आणि कागदपत्रे सादर केली. विशेषतः कर्नाटकातील महादेवपुरा विधानसभा मतदारसंघातील मतदारयाद्यांमधील गंभीर घोळांची माहिती त्यांनी दिली.
Follow the धुळे दर्पण channel on WhatsApp:
राहुल गांधींनी असा आरोप केला की, हा प्रकार फक्त एका मतदारसंघापुरता मर्यादित नाही, तर महाराष्ट्रातील अनेक मतदारसंघांमध्येही मतदान चोरीचे प्रकार घडले आहेत. ओपिनियन पोल आणि एक्झिट पोलचे अंदाज प्रत्यक्ष निकालांपेक्षा का आणि कसे वेगळे पडतात, याची आकडेवारी देऊन त्यांनी निवडणूक आयोगाच्या भूमिकेवर प्रश्नचिन्ह उपस्थित केले.
धुळ्यात शिवसेनेची आक्रमक भूमिका
या आरोपांचा निषेध आणि निवडणूक आयोगाची ‘निष्क्रिय भूमिका’ दर्शवण्यासाठी धुळे शिवसेना (उद्धव बाळासाहेब ठाकरे) गट रस्त्यावर उतरला. आंदोलनादरम्यान कार्यकर्त्यांनी “मतदान चोरी बंद करा”, “निवडणूक आयोग जागा हो”, “लोकशाही वाचवा” अशा जोरदार घोषणा दिल्या.
 |
| - Advertisement - |
निदर्शनात उपनेत्या शुभांगी पाटील, जिल्हाप्रमुख अतुल सोनवणे, उपजिल्हाप्रमुख नरेंद्र परदेशी, महानगर प्रमुख धीरज पाटील, शहर व जिल्हा पदाधिकारी, महिला आघाडी, युवासेना पदाधिकारी तसेच मोठ्या संख्येने शिवसैनिक सहभागी झाले.
लोकशाहीच्या रक्षणासाठी लढा सुरूच
आंदोलनादरम्यान वक्त्यांनी ठामपणे सांगितले की, “मतदान चोरी हा लोकशाहीवरील थेट आघात आहे. निवडणूक आयोगाने तात्काळ याची दखल घेऊन जबाबदारांवर कारवाई करावी. अन्यथा राज्यभर उग्र आंदोलन छेडले जाईल.”
शिवसेना पदाधिकाऱ्यांनी यावेळी निवडणूक आयोगाच्या भूमिकेवर प्रश्न उपस्थित करत, पारदर्शक आणि निष्पक्ष निवडणूक प्रक्रियेसाठी ठोस पावले उचलण्याची मागणी केली.
"बातम्यासाठी या ग्रुपमध्ये जॉईन व्हा."
धुळ्यातील हे आंदोलन राज्यातील मतचोरीविरोधातील चालू घडामोडींना अधिक तीव्रता देणारे ठरले असून, पुढील काही दिवसांत या विषयावर राजकीय तापमान आणखी वाढण्याची शक्यता आहे.
– धुळे दर्पण –
(आपल्या शहराच्या प्रत्येक घडामोडींचा वार्ताहर)
(आपल्या धुळे शहराची नवी दिशा)
तुमच्या सेवा आणि सुविधांची माहिती देणारे तुमचे विश्वासू माध्यम
 |
| - Advertisement - |
